1413. Juli 24. Rosenberg

Wir Bernhard von gotis gnaden herczog zu Falkinberg vnd herre zu Strelicz Bekennen uffentlichen mit desem brieffe allen den die en sehen adir horen lesen, das vor vns komen ist vnser lieber getrauwer Vlrich von Radaw wol gesunt leibes guter vornunft mit rote seiner frunde, vnd reychte uff recht vnd redelichen eyne marg ierigis czinsses vmb czehen marg Prager Grosschin Poln. czal, In vnd uff aliis das her hat zu Radaw vnsers Rosinbergis gebites, vnd uff aliis das darczu gehorit vil vnd wenig nichtis ausgenomen, den andachtigen In gote den Juncfrauwen des Clostirs Czarnowans zu eyner Lampen zu gebin vnd beczalen alle Jar ierlichin eyne marg czinsses uff Sand Mertins tag vnd uff den nest zu komenden an zu hebin, bey der phandunge die sie thuen mogen vmb vorsessenen czins mit vnsers houptmannes hulffe zu Rosinberg, als uffte en das notdorfft sein wurde, vnd mit genomen phanden zu thuen vnd lassen zu vorkeuffen zuuorseczin czu Juden adir Cristen gleich ab alle recht dinglichin domete begangen weren. Sundirlichin mag der genannte Vlrich vnde seine nachkomelinge die genante marg czinsses wedir keuffen vnd losen vmb czehen marg der geschrebener grosschin vnd czal, wenne sie das vormogen, von eynem yderman vngehindirt. Mit vrkunde desis brieffis bestetigit Ingeweisit vnd vorsegilt mit vnserem anhangenden Ingesegil. Gegebin zu Rosinberg an Sand Jacobs abund, Nach gotis geburt vierczenhundirt Jar, darnach in deme dreyczenden Jare. Do bey sint gewest vnsir liebin getrauwen, her Wischko Wippeler, Lodwig von Landisberg, Jenke von Cottelen vnsir houptman, Schinko von Radaw, Otto von Proske, Granofsky vnd Heinrich Dernheym vnser Schreiber.

Wappenschild mit dem Adler, und ein Helm darüber, in grünem Wachs; Umschrift: S. bernhardi. ducis. opolien.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 1, Urkunden des Klosters Czarnowanz. Hrsg von dr W. Wattenbach, Breslau 1857.